Los escolinos de 5º y 6º llevamos delles selmanes trabayando pa la entruga 6 del concursu “Ruempi la mollera”, buscando información de la desaparecida fábrica de cristal de La Bohemia que tuvo asitiada na nuesa ciudá, nun atopábemos muncho n’ internet nin nos llibros … y como nun mos gusta rendinos decidímonos a buscar per otros llaos.
Asina qu’esti llunes 30 d’ abril visitonos Xose Lluis “Pepe”, que vieno a compartir con nós los sos años d’ esperiencies y trabayu na fábrica La Bohemia.
Tráxonos un dvd d’ una grabación del añu 1989 fecha dientro la cristalería; gracies a les imáxenes y les desplicaciones que Pepe diba dándonos de caúna de les llabores, pudimos facenos idea del trabayu artesanal y en cadena qu’ ellí se facía. Sorpendímonos abondo viendo’ l resultáu final y camentamos que ye una pena la so desaparición.
Dempués del vídeu enseñonos dalgunes pieces de vidriu feches por él y ficimos-y una riestra entrugues pa saber dalgo más y retruconos asina:
¿Pepe, cuándo entamaste a trabayar na Bohemia?
Cuando tenía 14 años una muyer que conocía díxome que necesitaben xente y fui, entamé d’ aprendiz y ellí tuvi trabayando 40 años.
¿Cuántos trabayadores tenía la fábrica?
Nel entamu unos 250 y nos últimos años enantes del so cierre yéremos 100.
¿Sabes quién foi’ l fundador de la fábrica?
El fundador foi un coronel del exércitu pero nun lu vimos enxamás porque los que dirixíen la fábrica yeren los sos fios y xenros.
¿Cuántu tiempu funcionó?
Ente la etapa de los fundadores y llueu cuando los trabayadores ficimos la cooperativa pa quedanos con ella, en total unos 70 años.
¿Cuánto tiempu fai que zarró?
Fai unos 14 ó 15 años.
¿Pasasteislo mal cuando la crisis nos años 80?
Sí, pasámoslo permal y tuvimos que facer una cooperativa ente nós y pedir perres pa poder quedanos cola fábrica y asina nun quedar ensín trabayu.
¿Ye verdá que ficisteis dalgún encierru na fábrica?
Sí, ficimos encierru pa pedí-y al xefe que mos subiera’ l sueldu.
¿Yera una fábrica grande?
Sí, muncho, dicen que yera la cristalería más grande d’ Europa naquella dómina.
¿Tuvisteis dalgún accidente trabayando?
Sí, munches vegaes porque’ l vidriu taba mui caliente y quemábamos.
¿Facía munchu calor dientro?
Muncho, hasta 80 grados.
¿Qué horariu teníeis?
N’ iviernu trabayabemos de les 7 de la mañana a les 3 de la tarde y en branu de les 6 a 2.
Y pa finar ¿Ficiéronvos dalgún encargu especial?
Sí, teníemos munchos encargos, una vegada unos xeques árabes pidieron face-yos cientos de copes con un vidriu encarnáu y unos dibuxos tallaos, foi un trabayu percuriosu.
Gracies a Pepe pol sofitu que nos apurrió pa facer el guapu trabayu que vamos presentar.
Comparte este artículo